الأربعاء، 19 يونيو، 2013

الى حبيبى


فاكر ايام زمان وشارع مدرستنا.........الله على شوق زمان نضحك ويعلى صوتنا
فاكر ايام طفولتنا ياحبيبى
لما كنا صغيرين كان كل واحد فينا لما يشترى حاجة حلوة مهما كان صغر حجمها كنا بنقتسمها سوا
ولما كان والدك يشتريلك هدوم العيد مكنتش تفرح بيها الا لما تتأكد ان بابا اشترالى انا كمان هدوم العيد
وكنا نفضى العيد مع بعض نلعب ونركب مراجيح سوا
فاكر اول يوم ليك فى المدرسة كنت الولد الوحيد فى فصلك اللى معيطتش  يمكن عشان مطمن ان فصلى مجاور لفصلك واننا مع بعض
كان دايما والدك يقولك انت الراجل ليها دافع عنها واحميها بروحك
وانا اتأكدت انك فعلا الراجل بتاعى يوم ماضربت الولد اللى خطف منى كراستى الجديدة عشان يغيظنى ويضايقنى
وكنا دايما نروح المدرسة سو ونرجع سوا ودايما ايدينا فى ايد بعض
ولما وصلنا للأعدادى زعلت قوى ان كل منا هيبقى فى مدرسة لوحدة بحكم ان المدرسة غير مختلطة بس اللى هون علينا ان احنا كنا بنروح ونرجع سوى

بنتخاصم ونتصالح ودايما قلبى بيسامح
دايما اى اتنين بيحبوا بعض لازم ييجى وقت وتلاقيهم يتخانقوا ويتخاصموا
بس الفرق ان انا وانت خصامنا كان لا يستمر اكتر من ساعة
كان كل واحد فينا ميستحملش يفضل زعلان من التانى  ويروح يصالحة علطول

حبيبى مهما نتغير بيكبر حبنا معانا
كنا دايما لما نخرج سوا دايما ايدى تكون فى ذراعك وكنا نفرح اكتر لما الاهل يوافقوا نخرج لوحدنا
اه فاكر يوم ماجيت تحكيلى عن زميلتك اللى اعجبت بيها واتاكدت ان هى دى اللى هتبقى شريكة حياتك
وقتها رسمت ابتسامة وفرحة لكن جوايا حسيت بالغيرة ان فية واحدة هتاخدك منى
ويوم خطوبتك وجوازك كنت بدارى دمعتى بابتسامة وانت حسيت بيا ولقيتك تركت عروستك وجيت تشدنى من ايدى عشان ارقص معاك وقتها قلبى كان طاير من الفرحة عشان جيت ليا مخصوص وطلبت ارقص معاك
ورقصت معاك بفرحة وسعادة ولقيتك بعدها بتحضنى وتهمس ليا
((هى صحيح بقت مراتى لكن ....انتى هتفضلى دايما مكانك جوة قلبى ))
ومرت الشهور ولقيتك جيت فى يوم بتقولى
((فية ضيف جاى بعد شهور وهيقولك  ياعمتو ))
وقتها من شدة فرحتى ليك حضنتك و لقيت دموعى بتنزل غصب عنى كانت دموع فرح وسعادة
ودلوقت لما الانسة سلمى الصغيرة شرفت  حبيتها من اول لحظة شفتها فيها حبيتها وبقيت مش عاوزة اتركها ولو لحظة
ولغاية دلوقت غم شقاوتها احيانا لكن بحبها ونظرة واحدة ليها تنسينى اى تعب
بقت هى حبيبة قلبى

كل عام وانت الحب
تحبوا تعرفوا مين هو حبيبى اللى حكيت ليكم عنة
دة اخويا من دمى
من امى وابويا
متستغربوش اوى كدة انى بقولة ياحبيبى لأنة فعلا حبيب قلبى وكل مابيعدى يوم مشفهوش فية بيوحشنى قوى
الرسالة دى لحبيبى يوم عيد ميلادة 
كل سنة وانت طيب 


هناك 6 تعليقات:

  1. كل سنة وهو طيب وبخير
    ربنا يخليكو لبعض

    ردحذف
    الردود
    1. وانت طيب ياضياء
      اللهم امييييييييييين ويخليلك حبيابك يارب

      حذف
  2. الله الله بجد سلمت اناملك و دومتى متالقه

    ردحذف
    الردود
    1. ميرسى لحضرتك كتييييييييييير

      حذف
  3. صلاح الجبالى21 فبراير، 2014 3:16 م

    الله عليكى الله مشاء الله ربنا يحفظكم

    ردحذف
    الردود
    1. اللهم اميييييييييييييين ربنا يخليك يااستاذ صلاح

      حذف